ကိုးကန့် တိုက်ပွဲကြောင့် ကမ္ဘာ့အင်အားကြီးနိုင်ငံများနှင့် ဆက်ဆံရေး အထိခိုက်မခံဟု ဦးသိန်းစိန် ပြော

Friday, April 3, 2015

ကိုးကန့်တိုက်ပွဲများကြောင့် မြန်မာနိုင်ငံက ကမ္ဘာ့အင်အားကြီးနိုင်ငံများနှင့် မဟာဗျူဟာမြောက် ဆက်ဆံရေးကို အထိခိုက်ခံမည် မဟုတ်ကြောင်း သမ္မတ ဦးသိန်းစိန်က ပြောဆိုလိုက်သည်။
သမ္မတ ဦးသိန်းစိန်က ပြည်သူများကို လစဉ်ပြောဆိုနေသည့် ရေဒီယိုမိန့်ခွန်းအနေနှင့် ဧပြီလ ၃ ရက်က ရေဒီယို မိန့်ခွန်းတွင် ထိုသို့ ပြောဆို လိုက်ခြင်း ဖြစ်သည်။

ကိုးကန့်ဒေသရှိ တိုက်ပွဲသည် မြန်မာနိုင်ငံ၊ ရှမ်းပြည်နယ် မြောက်ပိုင်းနှင့် တရုတ် နယ်စပ်တွင် ဖြစ်ပွားနေသဖြင့် သမ္မတ၏ ပြောဆိုမှုတွင် ကမ္ဘာ့အင်အားကြီး နိုင်ငံများဆိုသည်မှာ တနည်းအားဖြင့် အိမ်နီးချင်း တရုတ်နိုင်ငံကို အဓိက ညွှန်းလိုခြင်း ဖြစ်ပြီး သွယ်ဝိုက် ဆိုလိုလိုက်ခြင်း ဖြစ်သည်ဟု အမျိုးသား ဒီမိုကရေစီ အဖွဲ့ချုပ်(NLD) ပါတီ အမျိုးသား လွှတ်တော်အမတ် ဦးအောင်ကြည်ညွှန့်က ပြော သည်။
ကိုးကန့် ပဋိပက္ခများနှင့်ပတ်သက်ပြီး သမ္မတက“အိမ်နီးချင်း နိုင်ငံတွေသာမက ကမ္ဘာ့အင်အားကြီး နိုင်ငံများနဲ့ ဆက်ဆံရေး ကောင်း ရှိဖို့ လိုအပ်နေတဲ့ အချိန်မှာ ဒီလို ပဋိပက္ခတွေကြောင့် ကျနော်တို့ နိုင်ငံရဲ့ မဟာဗျူဟာမြောက် ဆက်ဆံရေးကို အထိခိုက်ခံမှာ မဟုတ်ဘူး ဆိုတာကို ပြောကြားလိုပါတယ်”ဟု ရေဒီယိုတွင် ပြောဆိုသည်။


ဆက်လက်၍ အစိုးရအနေဖြင့် ကိုးကန့်ဒေသတွင် အရေးကြီးလုပ်ငန်းစဉ်အဖြစ် တည်ငြိမ်အေးချမ်းမှု ရရှိရေးကို အဓိကထား လုပ်ဆောင်နေသည်ဟုလည်း ဆိုသည်။

ဦးအောင်ကြည်ညွှန့်က သမ္မတအနေဖြင့် စကားလှအောင် ပြောဆိုခြင်းမပြုဘဲ တကယ်လိုအပ်နေသည့် ကိစ္စများကို အကောင်ထည် ဖော်ရန်၊ ကိုးကန့်အရေးတခုတည်း မဟုတ်ဘဲ အခြားကိစ္စ အရေးများတွင်လည်း ဆွေးနွေးသင့်သည့် အခါ ဆွေးနွေးပေးရန်၊ ညှိနှိုင်း ပေးရန် လိုအပ်သည်ဟုလည်း ဧရာဝတီကို ပြောသည်။

သမ္မတက လက်ရှိအစိုးရအဖွဲ့အနေဖြင့် တိုင်းရင်းသားများ၊ လူနည်းစုများ၏ အခွင့်အရေးကို အကာအကွယ် ပေးနိုင်ရန် ကိစ္စရပ်များကို ဦးစားပေးလုပ်ငန်းစဉ် အဖြစ် ဆောင်ရွက်နေသဖြင့် ကိုးကန့်ကိုယ်ပိုင်အုပ်ချုပ်ခွင့်ရ ဒေသရှိ နိုင်ငံရေး၊ စီးပွားရေး၊ လူမှုရေး များကို တည်ငြိမ်သွားစေရန်၊ ယခု ပဋိပက္ခ ရှိနေဆဲ အခြေအနေမှ ဖွံ့ဖြိုးတိုးတက်မှု ပြန်လည် ဖြစ်လာစေရန် ဆောင်ရွက်သွားမည်ဟု လည်း ဆိုသည်။

ရှမ်းပြည်နယ်မြောက်ပိုင်းနှင့် တရုတ်နယ်စပ်ရှိ ကိုးကန့်ကိုယ်ပိုင်အုပ်ချုပ်ခွင့်ရဒေသတွင် ဖေဖော်ဝါရီလ ၉ရက်မှစ၍ ယနေ့ အထိ အစိုးရ တပ်မတော်နှင့် မြန်မာ အမျိုးသား ဒီမိုကရေစီ မဟာမိတ် တပ်မတော်(MNDAA) ကိုးကန့် တပ်ဖွဲ့တို့အကြား တိုက်ပွဲများ ဖြစ် ပွားနေခြင်း ဖြစ်သည်။

ဖေဖော်ဝါရီလ ၁၈ ရက်တွင် အစိုးရတပ်မတော်က ကိုးကန့်ဒေသကို အရေးပေါ် အခြေအနေဖြစ်ကြောင်း၊ စစ်အုပ်ချုပ်ရေး အမိန့်ကြေညာခဲ့သည်။

တိုက်ပွဲများ ဖြစ်နေစဉ်အတွင်း တပ်မတော်မှ လေကြောင်းဖြင့် ကိုးကန့်တပ်ဖွဲ့ကို ပစ်ခတ်လိုက်သည့် ဗုံး တလုံးသည် တရုတ်နိုင်ငံ ယူနန်ပြည်နယ် လင်ချန်းခရိုင် အတွင်းရှိ ကြံခင်းအတွင်သို့ ကျခဲ့ပြီး တရုတ်နိုင်ငံသား ၅ ဦး သေဆုံး၍ ၉ ဦးဒဏ်ရာ ရရှိခဲ့မှု ဖြစ်ပွား ခဲ့သည်။

ထိုဖြစ်စဉ် အတွက် မြန်မာ နိုင်ငံခြားရေး ၀န်ကြီး ဦးဝဏ္ဏမောင်လွင်က တရုတ်နိုင်ငံကို တောင်းပန်ထားပြီး ထိခိုက်ခဲ့သည့် တရုတ် နိုင်ငံသား တဦးလျှင် အမေရိကန်ဒေါ်လာ တသောင်းကျော်စီ လျော်ကြေးပေးရန် ညှိနှိုင်းမှုများလည်း ပြုနေသည်ဟု တရုတ် မီဒီယာများတွင် ဖော်ပြထားသည်။

ပြည်တွင်းမှ ဒီမိုကရေစီအတိုက်အခံ အင်အားစုများ၊ လူ့အခွင့်အရေး လှုပ်ရှားသူများနှင့် ပြည်သူများက ကိုးကန့် တိုက်ပွဲကြောင့် သေနတ်ထိမှန် သေဆုံးသူများ၊ ဖမ်းဆီးခံရသူများ၊ နေရာအနှံ့သို့ ထွက်ပြေး တိမ်းရှောင် နေရသူများ၊ ဒုက္ခသည်စခန်းများတွင် နေ ထိုင်နေရသူများ၏ ကိစ္စကို အစိုးရအဖွဲ့က ဖြေရှင်းပေးခြင်း မပြုလုပ်ဘဲ ထိုသို့ တရုတ်နိုင်ငံသားများအပေါ်တွင် လျော်ကြေးပေး မည်ဟု ပြောဆိုမှုများနှင့် ပတ်သက်၍ အစိုးရအဖွဲ့ အပေါ် ဝေဖန် ပြောဆိုမှုများလည်း ရှိနေသည်။

ကိုးကန့်ဒေသတွင် တိုက်ပွဲများ ဖြစ်ပွားနေခြင်းကြောင့် ရှမ်းပြည်နယ်အတွင်းရှိ ဒုက္ခသည်စခန်းများတွင် စစ်တိမ်းရှောင်နေရသူ ၂၀၀၀ ခန့် ရှိသည်ဟု ဒုက္ခသည်စခန်းတွင် ကယ်ဆယ်ရေး တာဝန်ယူထားသူ ဦးလေးမောင်က ဧရာဝတီကို ပြောထားသည်။

ဧရာဝတီ