" ၀ " ခေါင်းဆောင် ၈ ဦးကို မူးယစ်ဆေးအမှုဖြင့် အမေရိကန်က တရားစွဲဆို

" ၀ " ခေါင်းဆောင် ၈ ဦးကို ၂၀၀၅ ခုနှစ် ဇန်န၀ါရီလမှစပြီး အမေရိကန်နိုင်ငံ နယူးယောက်အရှေ့ပိုင်းခရိုင် တရားရုံးတွင် အရှေ့တောင်အာရှ၏ အကြီးဆုံး မူးယစ်ဆေးဖြန့်ဖြူးသူများအဖြစ် သတ်မှတ်ပြီး အမှုဖွင့် အရေးယူခံထားရသူများဖြစ်ကြောင်း အမေရိကန် မူးယစ်ဆေး တားဆီးထိန်းချုပ် ရေးဌာန (DEA) မှ သတင်းထုတ်ပြန်ထားသည်။

၂၀၀၄ ခုနှစ်အတွင်း ဘိန်းတန်ချိန် ၁၈၀ ထုတ်လုပ်ဖြန့်ဖြူးခြင်းအတွက် " ၀ " စစ်တပ် (UWSA) တွင်လည်း တာဝန်ရှိကြောင်း (DEA)က ကြေညာထားကြောင်း သိရသည်။

 အမေရိကန်အစိုးရသည် " ၀ " တပ်မဟာ ၁၇၁ တပ်မဟာမှူးဟောင်း ဝေဆူကန် ကိုဖမ်းမိရန် သတင်းပေးနိုင်သူအား အမေရိကန်ဒေါ်လာ နှစ်သန်း ဆုချီးမြှင့်မည်ဖြစ်ကြောင်း လည်း ကြေညာထားသည်။

 ၄င်းမူးယစ်ဆေးအမှုဖြင့် တရားစွဲဆိုခြင်း ခံရသူများအနေဖြင့် ဖမ်းဆီးခံရပါက အနိမ့်ဆုံး ထောင်ဒဏ် ၁၀ နှစ်မှ တစ်သက်တစ်ကျွန်းအထိ နှင့် ငွေဒဏ် တစ်ဦးလျှင် အမေရိကန်ဒေါ်လာ လေးသန်း ပြစ်ဒဏ်ကျခံနိုင်ရကြောင်း အဆိုပါ သတင်းတွင် ဖော်ပြထားသည်။